ប្រែសម្រួល៖ រតនា

អូកឡិនដ៍៖ – ចៅក្រមសហព័ន្ធដែលត្រួតពិនិត្យសំណុំរឿងបានសម្រេចកាលពីថ្ងៃសុក្រថា បណ្តឹងរបស់មហាសេដ្ឋី Elon Musk ប្រឆាំងនឹងក្រុមហ៊ុន OpenAI នឹងត្រូវបញ្ជូនទៅគណៈវិនិច្ឆ័យនៅរដូវផ្ការីកឆ្នាំ២០២៦។

កាលពីខែមុន ក្រុមហ៊ុន OpenAI និងលោក Musk បានយល់ព្រមពន្លឿនការជំនុំជម្រះក្តីមួយទាក់ទងនឹងការប្តូរទិសដៅរបស់ក្រុមហ៊ុន OpenAI ទៅរកគោលដៅរកប្រាក់ចំណេញ ដែលជាការវិវត្តចុងក្រោយក្នុងការប្រកួតប្រជែងរវាងបុគ្គលដែលមានទ្រព្យសម្បត្តិច្រើនជាងគេលើពិភពលោក និងអគ្គនាយកក្រុមហ៊ុន OpenAI លោក Sam Altman ដែលកំពុងលេចឮជាសាធារណៈនៅក្នុងតុលាការ។

ចៅក្រម Yvonne Gonzalez Rogers នៃតុលាការសហព័ន្ធសម្រាប់មណ្ឌលភាគខាងជើងរដ្ឋកាលីហ្វ័រញ៉ា បានបដិសេធសំណើរបស់លោក Musk ដើម្បីផ្អាកការផ្លាស់ប្តូរគំរូអាជីវកម្មរបស់ក្រុមហ៊ុនផលិត ChatGPT ទៅជាគំរូរកប្រាក់ចំណេញ ហើយផ្ទុយទៅវិញ បានស្នើពន្លឿនការជំនុំជម្រះក្តី។

លោក Musk បានរួមបង្កើតក្រុមហ៊ុន OpenAI ជាមួយលោក Altman នៅឆ្នាំ២០១៥ ប៉ុន្តេបានចាកចេញមុនពេលក្រុមហ៊ុនមានភាពជោគជ័យ ហើយក្រោយមកបានបង្កើតក្រុមហ៊ុនដែលប្រកួតប្រជែង xAI នៅឆ្នាំ២០២៣។ កាលពីខែមុន ក្រុមហ៊ុន xAI បានទិញយកក្រុមហ៊ុនប្រព័ន្ធផ្សព្វផ្សាយសង្គម X របស់លោក Musk ក្នុងកិច្ចព្រមព្រៀងមួយដែលវាយតម្លៃក្រុមហ៊ុន X ៣៣ ពាន់លានដុល្លារ ហើយអនុញ្ញាតឱ្យតម្លៃក្រុមហ៊ុនបញ្ញាសិប្បនិម្មិតរបស់គាត់ត្រូវបានចែករំលែកជាមួយអ្នកវិនិយោគរួមគ្នានៅក្នុងក្រុមហ៊ុន X។

ឆ្នាំមុន លោក Musk ដែលក៏ជាអគ្គនាយកក្រុមហ៊ុន Tesla ផងដែរ បានប្តឹងក្រុមហ៊ុន OpenAI និងលោក Altman ដោយចោទប្រកាន់ថា OpenAI បានចាកចេញពីបេសកកម្មដើមរបស់ខ្លួន — គឺការអភិវឌ្ឍបញ្ញាសិប្បនិម្មិតដើម្បីប្រយោជន៍របស់មនុស្សជាតិ មិនមែនដើម្បីផលចំណេញសាជីវកម្មទេ។

ក្រុមហ៊ុន OpenAI និងលោក Altman បានបដិសេធការចោទប្រកាន់ទាំងនេះ ខណៈដែលលោក Altman បានចោទប្រកាន់ថា លោក Musk កំពុងព្យាយាមធ្វើឱ្យដៃគូប្រកួតប្រជែងយឺតយ៉ាវ។

អ្វីដែលកំពុងស្ថិតនៅក្នុងបណ្តឹងនេះគឺការផ្លាស់ប្តូរគំរូអាជីវកម្មរបស់ក្រុមហ៊ុនផលិត ChatGPT ទៅជាគំរូរកប្រាក់ចំណេញ ដែលក្រុមហ៊ុនថា មានសារៈសំខាន់ណាស់សម្រាប់ការរៃអង្គាសមូលធនបន្ថែម និងប្រកួតប្រជែងបានល្អក្នុងការប្រណាំងអភិវឌ្ឍបញ្ញាសិប្បនិម្មិតដែលត្រូវចំណាយប្រាក់ច្រើន។

ក្រុមហ៊ុន OpenAI កំពុងស្ថិតក្រោមសម្ពាធដើម្បីផ្លាស់ប្តូរឱ្យបានឆាប់រហ័ស។ បច្ចុប្បន្ន ក្រុមហ៊ុនកំពុងបង្កើនការវិនិយោគរហូតដល់ ៤០ ពាន់លានដុល្លារដែលដឹកនាំដោយក្រុមហ៊ុនវិនិយោគបច្ចេកវិទ្យាជប៉ុន SoftBank។ ក្រុមហ៊ុន SoftBank បាននិយាយថា ខ្លួនបានយល់ព្រមផ្តល់មូលនិធិ ១០ ពាន់លានដុល្លារដល់ក្រុមហ៊ុន OpenAI នៅពាក់កណ្តាលខែមេសា និងបន្ថែម ៣០ ពាន់លានដុល្លារទៀតនៅខែធ្នូ ដោយអាស្រ័យលើការផ្លាស់ប្តូរក្រុមហ៊ុនទៅជាគំរូរកប្រាក់ចំណេញនៅចុងឆ្នាំនេះ។

លោក Altman ដែលធ្លាប់បាននិយាយថា OpenAI មិនមែនជាក្រុមហ៊ុនសម្រាប់លក់ទេ បានបដិសេធសំណើទិញយកក្រុមហ៊ុនដោយមិនបានអញ្ជើញចំនួន ៩៧,៤ ពាន់លានដុល្លារពីសម្ព័ន្ធមួយដែលដឹកនាំដោយលោក Musk កាលពីដើមឆ្នាំនេះដោយគ្រាន់តែឆ្លើយថា “អរគុណ ខ្ញុំសូមបដិសេធ”៕
ប្រភព៖ រយទ័រ